SUREK DARI BALAI

Ado kegelisahan di hati kito, khususnya tentang sumber daya manusia Aie Angek, wa bil khusus, kuantitas jo kualitas kaum intelektualnyo. Sampai kini alun ado tabatiak-tabarito apolagi tatulih, bara jumlah urang Aie Angek nan lah menamatkan pendidikan perguruan tinggi, SLTA, SLTP dan sataruihnyo. Pun ndak ado informasi lengkap posisi, jabatan atau instansi, perusahaan tampek urang awak bakarajo. 

Salinteh mungkin hanyo beberapa urang sajo nan diketahui. Padahal dari bisiak ka bisiak, diprediksi jumlah urang awak nan alah mencapai posisi cukup strategis dan bergengsi di berbagai instansi pamarintah dan swasta cukuik lumayan.

Kagelisahan lain, dari sejumlah mereka nan alah berhasil tu, indak pulo diketahui sejauh ma peran serta mereka bahu-membahu membantu mengantarkan potensi-potensi nan dimiliki nagari Aie Angek, baik potensi manusianyo maupun potensi social-budaya dan seterusnyo.

Patuik dikemukakan di siko bahwa jika dibandiangkan jo nagari-nagari jiran Aie Angek, samangaik bakalompok kito jauh katinggalan. Ado indikasi nyato bahwa pado dasarnyo urang awak memang lamah dalam soal mambangun jaringan, kelompok, cenderung nafsi-nafsi mamikiakan diri sendiri. Ironinyo, umumnyo urang awak ingin mambangun kampuang, punyo perantau-perantau hebat, dan biasonyo mamanggakkan keberhasilan urang awak di hadapan urang lain. Namun upaya ke arah itu samo sekali ndak nampak.
Itu terjadi dimano-mano ranah perantauan. Sulik mengharapkan membangun jaringan jo kaum intelektual Aie Angek, membantu solusi nan dihadapi para junior mereka yang baru lulus sekolah.

Sebaliknyo, raso solidaritas, semangaik saling bahu-membahu dengan mudah kita tamukan di kalangan urang panggaleh. Dengan mudahnyo dunsanak-dunsanak kito nan manggaleh marangkul jo manunjuak ajari mereka-mereka nan baru datang dari kampuang. Sia sajo bisa mereka tampuang dan malapehnyo setelah nan bersangkutan bisa mandiri alias tagak surang. Mereka, urang panggaleh dengan tanpa birokrasi nan rumik dan aturan-aturan formil lainnyo dengan mudah menampung, manarimo sampai mambantu dalam bantuak permodalan. Bantuak itu faktanyo.

Nah, mungkin dimaso datang paralu, mereka kaum intelektual (labiah umum kito sabuik urang kantoran) bisa mulai mambangun jaringan sesama mereka, mamikiakan baa caronyo mambantu mambukak peluang, informasi lapangan karajo, informasi untuk pembangunan kampuang halaman dan sabagainyo.

Kini sadang musim Facebook! Pengguna internet makin banyak di kalangan urang awak, ndak ado salahnyo mambuek grup Aie Angek di Facebook, sekadar membincangankan banyak hal tentang nagari Aie Angek dan sagalo tetek bengek persoalannyo.

Usaho ka arah itu sadang cubo dirintis. Babarapo urang mudo di Jakarta mancubo mangelola sebuah blog sarupo nan dunsanak kunjungi ko. Memang, masih sangaik sederhana dan ala kadarnyo, tetapi iko dimaksudkan untuk manggutiak kawan-kawan, kaum intelektual nan lain untuk segera “babaua-baua” marumuskan sesuatu. Sesuatu itu mangacu ka upayo “Barek-maringani”

Sakian dulu ciloteh kami sekedar baurun-saran. Talabiah takurang, kok nyampang kurang tolong ditukuak, senteang di dunsanak pangunjuang nan ka mambilainyo. Kan iyo baitu?@ admin